शशांक कोइरालाः "गुटबन्दी अन्त्य गर्न कांग्रेस सभापतिमा उम्मेदवारी दिनेछु"
सिरहा — नेपाली कांग्रेसका पूर्व महामन्त्री तथा प्रतिनिधिसभा सदस्य डा. शशांक कोइरालाले पार्टीभित्रको गुटबन्दी अन्त्य गर्न सभापति पदमा उम्मेदवारी दिने घोषणा गरेका छन्।
धनुषामा पार्टी कार्यकर्तासँगको भेटघाट कार्यक्रममा उनले गुटबन्दीले कांग्रेस कमजोर बन्दै गएको भन्दै आफू मात्र त्यसलाई अन्त्य गर्ने सक्षम नेता भएको दाबी गरे। कोइरालाले पार्टीलाई गठबन्धनमा निर्भर बनाउनु गलत भएको उल्लेख गर्दै कांग्रेसलाई आत्मनिर्भर, बलियो र एकजुट बनाउनुपर्नेमा जोड दिए।
उनका अनुसार, उम्मेदवार छनोटमा विकेन्द्रीकरण अनिवार्य छ। “टिकट वितरणमा केन्द्रका केही नेताहरूको निर्णय मात्रै होइन, वडा, पालिका, क्षेत्र र जिल्ला तहका नेताहरूको सल्लाहअनुसार निर्णय गर्नुपर्छ,” उनले स्पष्ट पारे।
कोइरालाले भातृ संगठनहरू अस्तव्यस्त भएको, क्रियाशील सदस्यता व्यवस्थापनमा समस्या रहेको र विधानमै संशोधन आवश्यक भएको पनि बताए। उनका अनुसार, सबै पदमा निर्वाचन गराउँदा गुटबन्दी झन् बढ्ने भएकाले केवल सभापति पदमा मात्र प्रत्यक्ष चुनाव हुने व्यवस्था गर्नुपर्नेछ।
मधेसलाई पार्टीको आधार क्षेत्रका रूपमा प्रस्तुत गर्दै उनले त्यहाँ कांग्रेस पुनः सबल बनाउनुपर्ने धारणा राखे। “मधेसमा कांग्रेस बलियो भए मात्र सरकार स्थिर हुन्छ। कांग्रेसको जरा नै मधेसमा छ, त्यसलाई अब उपेक्षा गर्न सकिँदैन,” उनले भने।
अधिवेशन कहिले हुन्छ भन्ने कार्यकर्ताको प्रश्नमा उनले हालै सभापति शेरबहादुर देउवासँग सोही विषयमा छलफल गरेको बताए। उनले आगामी अधिवेशन समयमै सम्पन्न हुनेमा आफू विश्वस्त रहेको बताए।
