रुसको चेतावनी : अमेरिकाले आणविक परीक्षण गरेमा उस्तै जवाफ दिनेछौं
मस्को — रुसले अमेरिकाले आणविक हतियारको परीक्षण गरेमा त्यस्तै तरिकाले जवाफ दिने चेतावनी दिएको छ। रुसी उपविदेशमन्त्री सर्गेई र्याबकोभले एक पत्रकार सम्मेलनमा अमेरिका लामो समयदेखि आणविक परीक्षणका लागि तयारी गरिरहेको आरोप लगाएका छन्।
उपविदेशमन्त्री र्याबकोभले भने, "अमेरिकाले आणविक परीक्षण गर्छ भने रुसले पनि उस्तै तरिकाले र धेरै छिटो जवाफ दिनेछ।" तर उनले आफ्नो दाबीको समर्थनमा कुनै प्रमाण पेश गर्न सकेका छैनन्।
यसभन्दा अघि राष्ट्रपति भ्लादिमिर पुटिनले पनि यस्तै चेतावनी दिँदै भनेका थिए, "हामी देखिरहेका छौं कि अन्य देशहरूले तयारी गरिरहेका छन्। यदि उनीहरूले परीक्षण गरे भने हामी पनि त्यस्तै गर्नेछौं।"
रुसले नयाँ स्टार्ट आणविक सन्धि विस्तारको प्रस्तावमा अमेरिकाबाट औपचारिक प्रतिक्रिया नआएको पनि उल्लेख गरेको छ। सेप्टेम्बरमा पुटिनले रुसले सन्धि अवधि समाप्त भएपछि पनि कम्तीमा एक वर्षसम्म सर्तहरू पालना गर्न तयार रहेको जनाएका थिए।
